நீதிமன்ற உத்தரவுடன் விமலைக் காப்பாற்ற கோதாபய முனைப்பு

ஐக்கிய நாடுகளின் கொழும்பு அலுவலகத்திற்கு அருகில் இன்று சாகும் வரையிலான உண்ணாவிரதப் போராட்டத்தை ஆரம்பித்துள்ள விமல் வீரவங்சவை காப்பாற்றுவதற்கு நீதிமன்ற உத்தரவொன்றைப் பெற்று அவரை அந்த இடத்திலிருந்து அகற்றுவதற்கு பாதுகாப்புச் செயலாளர் கோதாபய ராஜபக்சா நடவடிக்கை எடுத்து வருவதாக தெரியவருகிறது.

அரசாங்கத்தின் உட்தரப்புத் தகவல்களின்படி விமல் வீரவங்ச, ஜனாதிபதிக்கு நெருக்கமான அமைச்சர்கள் சிலருடன் நேற்றிரவு இந்தத் திட்டம் குறித்து பேச்சுவார்த்தையொன்று இடம்பெற்றுள்ளது.

தேசிய சுதந்திர முன்னணி கடந்த 06ம் திகதி நடத்திய ஆர்ப்பாட்டம் அரசாங்கத்தின் ஆதரவுடன் நடைபெற்றது எனத் தெரியவந்ததை அடுத்து ஐக்கிய நாடுகள் அமைப்பு அந்த ஆர்ப்பாட்டத்தைக் கண்டு கொள்ளாது செயற்பட்டு வருவதன் காரணமாக காவல்துறையினர் மீது பழியைச் சுமத்திவிட்டு தனது எதிர்ப்பு நடவடிக்கையை நிறுத்திக் கொள்ள விமல் வீரவங்ச இந்தத் திட்டத்தை செயற்படுத்தவுள்ளார்.

இதனடிப்படையில், அவரை உண்ணாவிரதப் பந்தலிலிருந்து அகற்றுவதற்காக காவல்துறையினர் நாளைய தினம் நீதிமன்ற உத்தரவொன்றைப் பெறவுள்ளனர்.