செய்திகள்

முள்ளிவாய்க்கால் பாரிய இன அழிப்பிற்கு பின்னர் இடம்பெற்ற பெரும் அழிவு

மட்டக்களப்பு கரடியனாற்றில் இன்று மதியம் இடம்பெற்ற பாரிய வெடிபொருள் வெடிப்பில் நான்கு சீனர்கள் உள்ளிட்ட 62ற்கும் மேற்பட்டவர்கள் கொல்லப்பட்டுள்ளார்கள், நூற்றுக் கணக்கானவர்கள் படுகாயமடைந்துள்ளார்கள்.

மட்டக்களப்பு மாவட்டத்தின் கரடியனாறு பகுதியில் அமைந்துள்ள சிறிலங்கா காவல்துறை வாளாகத்திற்கு அண்மையில் வெடிபொருட்கள் நிரப்பிய 3 கொள்கலன்கள் வெடித்துள்ளன. ஒரு கொள்கலன் வெடித்ததைத் தொடர்ந்து ஏனைய இரண்டும் வெடித்ததாக கூறப்படுகின்றது. இதன்போது காவல்துறை வளாகம் முற்றாக தரைமட்டமாகியுள்ளது.

உயிரிழந்தவர்கள் பெருமளவானவர்கள் சிறீலங்கா காவல்துறையினர் என்றும் ஏனையவர்கள் பலர் சமுர்த்தி அலுவலக ஊழியர்கள், பொது மக்கள் என்றும் ஆரம்பகட்டத் தகவல்கள் தெரிவிக்கின்றன. காயமடைந்தவர்கள் மட்டக்களப்பு மருத்துவமனையில் அனுமதிக்கப்பட்டுள்ளதாகவும் தெரிவிக்கப்பட்டுள்ளது.

இன்று வெள்ளிக்கிழமை மதியம் 12.30 மணியளவில் இடம்பெற்ற வெடிப்புச் சம்பவம் தொடர்பில் சிறிலங்காவின் விசேட படையினர் விசாரணைகளை மேற்கொண்டு வருவதாக இராணுவப் பேச்சாளர் மேஜர் ஜெனரல் உபய மெதவல தெரிவித்தார். அரசியல் காரணமாகவோ அல்லது நாசகார வேலை காரணமாகவோ இந்த வெடிப்புச் சம்பவம் இடம்பெற்றுள்ளது என்பதை தாம் முற்றாக நிராகரிகரிப்பதாகக் கூறியுள்ள அவர், படையினர் விசாரணைகளில் ஈடுப்பட்டிருப்பதாகவும் தெரிவித்துள்ளார்.

ஐ.நாவில் உரையாற்றுவதற்காக ஜனாதிபதி மகிந்த ராஜபக்ச வெளிநாடு சென்றிருக்கும் நிலையில் இக்குண்டுவெடிப்பு இடம்பெற்றுள்ளது. சிறிலங்கா அரசாங்கத்தினால் மட்டக்களப்பு அம்பாறை மாவட்டங்களில் அபிவிருத்தி பணிகள் எவையும் முன்னெடுக்காத நிலையில் சீனர்களின் அதிகரித்த வருகையும், வெடிபொருட்கள் நிரப்பிய கொள்கலங்கள் அங்கு கொண்டுவரப்பட்டமையும் மட்டக்களப்பு தமிழ் மக்கள் மத்தியில் பாரிய அச்சத்தை ஏற்படுத்தியுள்ளது.

தமிழ் மக்கள் வாழும் பகுதியில் இவ்வளவு பெருந்தொகையான வெடிபொருட்கள் ஏன் களஞ்சியப்படுத்தி வைக்கப்பட்டுள்ளன என்ற கேள்வியையும் எழுப்பியுள்ளது.
அத்துடன், சீனாவிற்கும் சிறிலங்காவிற்கும் இடையிலான படைகல உதவிகளைப் பலப்படுத்துவதற்கு இரு நாடுகளும் இணங்கியுள்ள நிலையில் மட்டக்களப்பு மாவட்டத்திலும் சீனர்களின் ஆதிக்கத்தை எடுத்துக்காட்டும் நிகழ்வாக இது அமைகின்றது.

சீனாவின் தகவல் தொழில்நுட்ப உதவியுடன் சிறிலங்கா இராணுவ முகாம்கள் கணணி மயப்படுத்தப்படவுள்ளதாக இராணுவத்தினர் தெரிவித்திருந்தனர். தகவல் தொழில்நுட்பம் தொடர்பில் இராணுவத்தினர் விசேட கவனம் செலுத்தவிருப்பதாகவும் நாட்டிலுள்ள அனைத்து இராணுவ முகாம்களும் உடனடியாக ஒரே வலையமைப்புக்குள் கொண்டு வரப்படும் எனவும் இராணுவத் தளபதி லெப்டினன்ட் ஜெனரல் ஜெகத் ஜெயசூரியா தெரிவித்திருந்தார்.

இராணுவ முகாம்களைக் கணனி மயப் படுத்துவதற்கான தொழில்நுட்ப உதவிகள் சீனாவிடமிருந்து கிடைத்துள்ளதாகவும் முதற்கட்டத் திட்டங்கள் தற்போது ஆரம்பிக்கப்பட்டுள்ளதாகவும் இராணுவத்தின் உள்தரப்புத் தகவல்கள் தெரிவித்திருந்தன. அதேவேளை புலனாய்வுப் பிரிவினருக்குத் தேவையான தொழில்நுட்ப அறிவையும் சீனாவின் போர் நுட்ப நிபுணர்களே வழங்கியிருக்கின்றனர் என்றும் தெரிவிக்கப்பட்டிருந்தது.

இந்நிலையில் இப்பாரிய வெடிவிபத்து ஏற்பட்டுள்ளது. அத்துடன், சிறிலங்காவின் முள்ளிவாய்க்கால் பாரிய இன அழிப்பிற்கு பின்னர் இடம்பெற்ற பெரும் அழிவு இது என்பதும் குறிப்பிடத்தக்கது.