இலங்கை தமிழ்

தமிழ்த் தேசியம் கிடைப்பதென்பது வீட்டை காட்டி ஏமாற்றும் துரோகிகளால் அல்ல!!

தமிழ்த் தேசியம் கிடைப்பதென்பது வீட்டை காட்டி ஏமாற்றும் துரோகிகளால் கைகூடப்போகும் ஒரு நிகழ்வு அல்ல!! – தொலைநோக்கு..!

தவறான சிந்தனைகளை எமது மக்கள்மத்தியில் தந்திரமாக பரப்பிவிட்டு இன்று பழைய துரோகிகள் அனைவரும் அவரவர் தத்தமது கட்சிகளை பலப்படுத்துவதிலேயே தாம் குறியாக இருந்துவருகிறார்கள்.

புலிகள் அமைப்பின் ஆயுத பலவீனத்தை தமக்கு சாதகமாக்கி புலிகளின் அரசியல் சக்தியை மக்கள் மனங்களிலிருந்து அழித்து தமது பழமையான துரோக அரசியலை வேகமாக வளர்த்துவரும் இந்த துரோக கட்சிகளுக்கு, புலிகளின் மக்கள் செல்வாக்கே பெரும் தூண்களாக பயன்பட்டுவருகின்றது.

எமது தலைவர்தான் வீட்டை எமக்கு காண்பித்தார் எனும் ஒரேயொரு பிடியை இறுக்கமாக கடைப்பிடித்துவரும் இந்த துரோக கட்சிகள் அனைத்தும்,அந்த வீட்டை பயன்படுத்தியே புலிகளின் மக்கள் செல்வாக்கை பிரித்து பிரித்து தத்தமது கட்சிகளை பலப்படுத்துவதற்கு தந்திரமாக இந்த வீட்டை பயன்படுத்திவருகிறார்கள்.

இன்றைய காலகட்டத்தில் வீட்டுக்கு வாக்களிக்காதவர்கள் யாவரும் துரோகிகள் என்று கூறிவருபவர்களும்,மானமுள்ள தமிழனாக இருந்தால் வீட்டுக்கு வாக்களி என்று கூறிவருபவர்களும் இந்த துரோக கட்சிகளின் அடிவருடிகளே.

இலங்கை சிங்கள அரசின் அரசியல் பாகுபாடு காரணமாக தமிழர்களுக்கு எழுந்த உயிரச்சுறுத்தலை தடுப்பதற்காக கடந்த முப்பது வருடங்களாக போராடிய எமது மாவீரர்களையும்,போராளிகளையும் அவர்களின் குடும்பங்களையும் நோக்கி வீட்டுக்கு நீங்கள் வாக்களிக்காவிட்டால் மானமற்றவர்கள் என்று கூறுவதற்கு இந்த துரோக கட்சிகளுக்கு என்ன உரிமை உள்ளதென்பதே எமது கேள்வியாகும்?

தனது இனத்தை சடுதியாக வந்த ஆபத்துக்களிலிருந்து காப்பதற்கு பதிலாக,ஆபத்தை உருவாக்கியவர்களுடன் கூட்டிணைந்து இன்னும் பெரிய ஆபத்துக்களை உருவாக்கிய இந்த இரத்தக்கறைபடிந்த கட்சிகளுக்கு, தம்மையே அர்பணித்து தமது இனங்காக்க போராடிய புலிகளையும்,அவர்களின் மக்களையும் நோக்கி கீழ்த்தரமான கேள்விகளை எப்படி இவர்களால் கேட்கமுடியும்?

நாம் தேசியம் என்ற பலத்தை அரசியல் ரீதியாக கட்டியெழுப்பவே அன்று துரோகிகளுக்கு பொதுமன்னிப்பு வழங்கி வீடு என்ற சின்னத்தை அறிமுகம்செய்து அந்த வீட்டிற்குள் இந்த துரோகிகள் அனைவரையும் கட்டிவைத்து எமது மக்களை அரசியல்ரீதியாக இந்த நரிகளை பயன்படுத்தி உலகத்திற்கு எமது மக்களின் உண்மையான எதிர்பார்ப்புக்களை வெளிக்கொணர்ந்தோம்.

ஆனால் துரதிஷ்டவசமாக 2009ல் நிகழ்ந்த உலகநாடுகளின் கோரமான பார்வை எம்மை ஆயுதரீதியாக பலவீனப்படுத்திவிட்டதால் அதை தமது பழைய துரோகங்களை தொடர்வதற்கான ஏதுவான சூழலாக மாற்றியமைத்த த.தே.கூட்டமைப்பில் இணைந்துகொண்ட துரோக கட்சிகளும்,இணையாத துரோக கட்சிகளும் புலிகளின் மக்கள் செல்வாக்கை தமக்கு தமக்கென்று தந்திரமாக பிரிப்பதற்கு பயன்படுத்திவருகிறார்கள் என்ற கசப்பான உண்மையை எமது மக்கள் நிச்சயம் விளங்கிக்கொள்வது அவசியமானது.
தலைவர்தான் ஒருங்கிணைத்தார் என்ற சொற்பதமானது துரோக கட்சிகளுக்கே உரித்தானது.(இது எமது மக்களுக்கானதல்ல)யாரை ஒருங்கிணைத்தார் எமது தலைவர்? துரோகிகளையா?மக்களையா? துரோகிகளுக்கு பின்னால் இருந்த மக்கள் அனைவரும் தேசியத்திற்காக போராடியவர்களா? புலிகளால் பட்டியலிடப்பட்ட துரோகிகளின் குடும்பங்கள் சிலர்கூட இன்றுவரை தமது சொந்த உறுப்பினர்களுக்கு மட்டுமே வாக்களித்துவருகிறார்கள்.

ஆனால் இன்றுவரை தேசியம் என்று பொதுவாக வாக்களிப்பவர்கள் யார்?
மாற்றியக்க துரோகிகளின் உறவினர்களா?

புலிகளை பின்பற்றி, அவர்களின் கொள்கைகளை பின்பற்றி இறுதிவரை புலிகளோடு சகலவழிகளிலும் ஒத்திசைவாக வாழ்ந்த இலட்சக்கணக்கான மக்களே இன்றுவரை தேசியம் என்ற சொல்லுக்கு வாக்களித்துவருகிறார்கள் என்பதனை இதுவரை தெரிந்திராதவர்கள் தெரிந்துகொள்ளுங்கள்.

ஆகவே புலிகளை வைத்து,அவர்களின் மக்களை வைத்து, அவர்களின் தியாகங்களை வைத்து தத்தமது கட்சிகளை அரசியல்ரீதியாக பலப்படுத்தி எமது மாவீரர்களினதும், போராளிகளினதும், மக்களினதும் உயரிய அர்ப்பணிப்புக்களை சிதைத்து,எதிர்காலத்தில் தாம்தான் தமிழருக்காக போராடிய தேசிய வீரர்கள் என்று இந்த தூரோகிகள் அனைவரும் தம்மை நிலைநிறுத்தி எம்மை அழித்தொழிப்பார் என்பதை யார் உணராவிட்டாலும்,எமது தலைவன்வழி அணிதிரண்ட மக்கள் அனைவரும் நிச்சயம் இதை உணரவேண்டியது அவசியமானது.